ਨਫ਼ਰਤ ਕੱਢ ਕੇ ਦਿਲ ਵਿਚੋਂ.......... ਗ਼ਜ਼ਲ / ਸੰਧੂ ਵਰਿਆਣਵੀ

ਨਫ਼ਰਤ ਕੱਢ ਕੇ ਦਿਲ ਵਿਚੋਂ ਆ ਪਿਆਰ ਦੀ ਹੀ ਗੱਲ ਕਰੀਏ
ਆ ਜਾ ਆਪਣੇ ਰਿਸ਼ਤੇ ਦਾ ਹੁਣ ਹੋਰ ਕੋਈ ਨਾਂ ਧਰੀਏ

ਅਲਖ ਮੁਕਾਉਣੀ ਹੈ ਤਾਂ ਬੇਦਰਦਾਂ ਦੀ ਅਲਖ ਮੁਕਾਓ
ਦੁਸ਼ਮਣ ਦੇ ਆਖੇ ਤੇ ਆਪਾਂ ਲੜ ਲੜ ਕੇ ਕਿਉਂ ਮਰੀਏ


ਹਿੰਮਤ ਬਿਨ ਨਾ ਬੇੜੀ ਅਪਣੀ ਕਦੇ ਕਿਨਾਰੇ ਲੱਗਣੀ
ਜ਼ਾਲਿਮ ਦਾ ਨਾ ਜ਼ੁਲਮ ਹਮੇਸ਼ਾ ਹੱਸ ਹੱਸ ਕੇ ਹੀ ਜਰੀਏ

ਤੱਤੀਆਂ ਪੌਣਾਂ ਨੇ ਪਹਿਲਾਂ ਹੀ ਦਿੱਤੇ ਜ਼ਖ਼ਮ ਬਥੇਰੇ
ਆਓ ਹੁਣ ਰਲ਼ ਮਿਲ਼ ਕੇ ਆਪਾਂ ਮਰਹਮ ਦੀ ਗੱਲ ਕਰੀਏ

ਵਾਂਗ ਕਬੂਤਰ ਨਾ ਹੁਣ ਆਪਾਂ ਅੱਖਾਂ ਮੀਟੀ ਜਾਈਏ
ਮਰਨਾ ਹੀ ਹੈ ਜੇਕਰ ਆਪਾਂ ਮਰਦਾਂ ਵਾਂਗੂ ਮਰੀਏ

ਬਾਹਾਂ ਦੇ ਵਿਚ ਬਾਹਾਂ ਪਾ ਕੇ ਤੁਰੀਏ ਆ ਜਾ ਸੰਧੂ
ਫੁੱਲਾਂ ਵਾਂਗੂ ਮਹਿਕ ਖਿਡਾਉਂਦੇ ਦੁਖ ਦਾ ਸਾਗਰ ਤਰੀਏ

ਆਪਾਂ ਸਭ ਦੁੱਖ ਸਹਿ ਜਾਣੇ.......... ਗ਼ਜ਼ਲ / ਸੰਧੂ ਵਰਿਆਣਵੀ

ਆਪਾਂ ਸਭ ਦੁੱਖ ਸਹਿ ਜਾਣੇ ਹਨ
ਦਿਲ ਦੇ ਜਜ਼ਬੇ ਕਹਿ ਜਾਣੇ ਹਨ

ਨਕਸ਼ ਇਹ ਤੇਰੇ ਸੁਹਣੇ-ਸੁਹਣੇ
ਮੇਰੇ ਦਿਲ ਵਿਚ ਲਹਿ ਜਾਣੇ ਹਨ


ਇਹ ਮਾਲੂਮ ਨਹੀਂ ਸੀ ਸਾਨੂੰ
ਅਪਣੇ ਘਰ ਵੀ ਢਹਿ ਜਾਣੇ ਹਨ

ਤੱਤੀ ਪੌਣ ਤੇ ਇਹ ਕਾਲੇ਼ ਦਿਨ
ਬੀਤੇ ਦੀ ਗੱਲ ਰਹਿ ਜਾਣੇ ਹਨ

ਜਿਥੋਂ ਦੀ ਤੂੰ ਲੰਘ ਗਿਆ ਏਂ
ਪੈੜਾਂ ਦੇ ਚਿੰਨ੍ਹ ਰਹਿ ਜਾਣੇ ਹਨ

ਰੋਕ ਨਹੀਂ ਸਕਦਾ ਤੂੰ ਸੰਧੂ
ਹੰਝੂ ਤੇਰੇ ਵਹਿ ਜਾਣੇ ਹਨ