ਵੱਡਾ ਭਾਈ ਵੇਖ ਰਿਹਾ ਹੈ.......... ਲੇਖ / ਜੋਗਿੰਦਰ ਬਾਠ ਹੌਲੈਂਡ

ਪੂਜਾ ਮਿਸ਼ਰਾ ਨੂੰ ਦੁਬਾਰਾ ਬਿਗ ਬੌਸ ਸੋ਼ਅ ਵਿੱਚ ਸ਼ਾਮਲ ਕਰ ਲਿਆ ਗਿਆ । ਪਿਛਲੀ ਵਾਰ ਬੀਬੀ ਪੂਜਾ ਮਿਸ਼ਰਾ  ਦੀ ਦੂਹਰੀ ਵਾਰ ਵਾਇਲਡ ਕਾਰਡ ਐਂਟਰੀ ਹੋਈ ਸੀ ਤੇ ਹੁਣ ਫਿਰ ਇਸ ਨੂੰ ਇਸ ਸੋ਼ਅ ਵਿੱਚੋ ਕੱਢ ਦਿੱਤਾ ਗਿਆ । ਜਾਂਦੀ ਜਾਂਦੀ ਬੀਬੀ ਪੂਜਾ ਇਹ ਵਿਸਮਾਂਦੀ ਬਿਆਨ ਵੀ ਦੇ ਗਈ ਕਿ ਜਦ ਉਹ ਸੁੱਤੀ ਪਈ ਸੀ ਤਾਂ ਕੋਈ ਉਸ ਦੇ ਸਰੀਰ ਤੇ ਲਵ ਸਪੋਟ ਯਾਨਿ ਕਿ ਪਿਆਰ ਦੇ ਨਿਸ਼ਾਨ ਛੱਡ ਗਿਆ ਹੈ, ਜਿਸ ਨੂੰ ਤੁਸੀਂ ਪਿਆਰ ਦੀਆਂ ਪੈੜਾਂ ਵੀ ਕਹਿ ਸਕਦੇ ਹੋ। ਠੇਠ ਪੰਜਾਬੀ ਵਿੱਚ ਮਤਲਬ ਇਹ ਹੈ, ਕੋਈ ਉਸ ਦੀ ਦੇਹ ਨੂੰ ਸਾਰੀ ਰਾਤ ਦੰਦੀਆਂ ਵੱਢਦਾ ਰਿਹਾ ਤੇ ਬੀਬੀ ਪਰਮ ਆਨੰਦ ਵਿੱਚ ਸੁੱਤੀ ਰਹੀ। ਸਾਰੀ ਰਾਤ ਉਸ ਨੂੰ ਇਸ ਮਿੱਠੀ ਆਨੰਦਮਈ ਪੀੜ ਦਾ ਅਹਿਸਾਸ ਤੱਕ ਨਹੀਂ ਹੋਇਆ ਤੇ ਹੁਣ ਇਸ ਮਾਸੂਮ ਬੀਬੀ ਨੂੰ ਸਾਰੀ ਰਾਤ ਦੰਦੀਆਂ ਵੱਢਣ ਵਾਲੇ ਦਾ ਕੋਈ ਇਲਮੋ ਅਹਿਸਾਸ ਨਹੀਂ ਹੈ । ਉਹ ਪਾਗਲ ਕੁੱਤੀ ਵਾਂਗ ਆਪਣੇ ਸਾਥੀਆਂ ਤੇ ਇਲਜ਼ਾਮ ਲਾਉਂਦੀ ਫਿਰਦੀ ਰਹੀ ਕਿ ਹੋ ਸਕਦਾ ਹੈ ਇਹ ਹੋਵੇ ਤੇ ਹੋ ਸਕਦਾ ਹੈ ਉਹ ਵੀ ਹੋਵੇ । ਲਵ ਸਪੋਟਰ, ਯਾਨਿ ਕਿ ਦੰਦੀਆਂ ਵੱਢਣ ਵਾਲੇ ਜਾਂ ਵਾਲਿਆਂ ਨੂੰ ਜ਼ਰੂਰ ਇਸ ਦਾ ਸਪਸ਼ਟੀਕਰਨ ਦੇਣਾ ਪਵੇਗਾ, ਨਹੀਂ ਤਾਂ ਜੇ ਇਸ ਦਾ ਕੋਈ ਭੈੜਾ ਨਤੀਜ਼ਾ ਨਿਕਲ ਆਇਆ ਤਾਂ ਬੀਬੀ ਕਿਹੜੀ ਮਾਂ ਨੂੰ ਜਵਾਕ ਦੀ ਦਾਦੀ ਆਖੇਗੀ ਅਤੇ ਕੀਹਦਾ ਕੀਹਦਾ ਡੀ. ਐਨ. ਏ. ਚੈੱਕ ਕਰਵਾਉਂਦੀ ਫਿਰੇਗੀ। 
ਬੀਬੀ ਜੀ ! ਤੁਹਾਡੇ ਤੇ ਚੌਵੀ ਘੰਟੇ ਕੈਮਰੇ ਫਿੱਟ ਸਨ, ਸ਼ੋਅ ਦੇ ਮਾਲਕ ਬਨਾਮ ਬਿਗ ਬੌਸ ਨੂੰ ਕਹੋ, ਜ਼ਰਾ ਫਿਲਮ ਨੂੰ ਪਿੱਛਲਖੂਰੀ ਤੋਰ ਕੇ ਵਿਖਾ ਦੇਵੇ । ਦੰਦੀਆਂ ਵੱਢਣ ਵਾਲਾ ਅਪਣੇ ਆਪ ਦਿਸ ਪਵੇਗਾ । ਵੈਸੈ ਝੂਠ ਦੀ ਵੀ ਕੋਈ ਹੱਦ ਹੁੰਦੀ ਹੈ। ਇਸ ਸ਼ੋਅ ਦੀ ਬੇਹੂਦਗੀ ਅਤੇ ਅਸ਼ਲੀਲਤਾ ਬਾਰੇ ਬਹੁਤ ਸਾਰੀਆਂ ਸਮਾਜਸੇਵੀ ਜੱਥੇਬੰਦੀਆਂ ਨੇ ਇਤਰਾਜ਼ਾਂ ਵਾਲਾ ਵਾਵਰੋਲਾ ਝੁਲਾਇਆ ਸੀ। ਇਤਰਾਜ਼ ਵੀ ਉਨ੍ਹਾਂ ਲੋਕਾਂ ਦੇ ਜਾਇਜ਼ ਸਨ। ਟੀ ਵੀ ਚੈਨਲ ਵਾਲਿਆਂ ਅਤੇ ਸੂਚਨਾ ਪ੍ਰਸਾਰਨ ਮੰਤਰੀ ਨੂੰ ਵੀ ਇਸ ਸੋ਼ਅ ਦਾ ਵਕਤ ਸ਼ਾਮ ਦੇ ਦਸ ਵਜੇ ਦੀ ਬਜਾਏ ਅੱਧੀ ਰਾਤ ਤੋਂ ਬਾਅਦ ਰੱਖਣ ਬਾਰੇ ਚੇਤੰਨ ਲੋਕਾਂ ਵਲੋਂ ਅਪੀਲਾਂ ਕੀਤੀਆਂ ਗਈਆਂ ਸਨ ਪਰੰਤੂ ਇਨ੍ਹਾਂ ਅਪੀਲਾਂ, ਦਲੀਲਾਂ ਦਾ ਉਲਟਾ ਅਸਰ ਹੋਇਆ। ਇਸ ਸੋ਼ਅ ਵਿੱਚ ਸ਼ਾਮਲ ਭਾਰਤੀ ਮੂਲ ਦੀ ਕਨੇਡਾ ਦੀ ਜੰਮਪਲ, ਅਮਰੀਕਾ ਦੇ ਹਾਲੀਵੁੱਡ ਵਿੱਚ ਧੰਦਾ ਕਰਦੀ ਇੱਕ ਸਿੱਖ ਬੀਬੀ ਸੰਨੀ ਲਿਉਨ ਨੂੰ ਹੁਣ ਤੱਕ ਕੇਵਲ ਬਾਲਗਾਂ ਲਈ ਵੈਬਸਾਇਟਾਂ ਵੇਖਣ ਵਾਲੇ ਠਰਕੀ ਲੋਕ ਹੀ ਜਾਣਦੇ ਸਨ, ਪਰੰਤੂ ਇਸ ਠਰਕੀਲੇ ਵਿਵਾਦ ਤੋਂ ਬਾਦ ਬੀਬੀ ਸੰਨੀ ਲਿਉਨ ਦੀ ਵੈਬਸਾਇਟ ਨੂੰ ਵੇਖਣ ਅਤੇ ਸੇਕਣ ਵਾਲੇ ਪਰਾਹੁਣਿਆਂ ਦੀ ਗਿਣਤੀ ਵੀਹ ਮਿਲੀਅਨ ਤੱਕ ਪਹੁੰਚ ਗਈ ਹੈ ਤੇ ਹੁਣ ਗੂਗਲ ਸਰਚ ਨੇ ਇਹ ਖੁਲਾਸਾ ਕੀਤਾ ਹੈ ਕਿ ਸੰਨੀ ਨੂੰ ਚਾਹੁਣ, ਚਾਖਣ ਵਾਲੇ ਵੈਬਸਾਈਟੀ ਬੁੱਢਿਆਂ ਜਵਾਨਾਂ ਦੀ ਗਿਣਤੀ ਐਸ਼ਵਰਿਆ, ਕੈਥਰੀਨਾ ਕੈਫ, ਕਰੀਨਾ ਕਪੂਰ, ਬਿਪਾਸ਼ਾ ਬਾਸੂ ਨਾਲੋਂ ਵੀ ਜਿ਼ਆਦਾ ਹੈ। ਉਨ੍ਹਾਂ ਚਾਖਣ ਵਾਲੇ ਵੈਬਸਾਈਟੀਆਂ ਵਿੱਚੋਂ ਇੱਕ ਮੈਂ ਵੀ ਹਾਂ। ਇੱਕ ਦਬੰਗ, ਅੜਬੰਗ ਅਤੇ ਸੁੱਤੇ ਪਏ ਬੰਦਿਆਂ ਤੇ ਅੱਧੀ ਰਾਤ ਨੂੰ ਸ਼ਰਾਬ ਦੇ ਨਸ਼ੇ ਵਿੱਚ ਕਾਰ ਚੜ੍ਹਾਉਣ ਵਾਲਾ ਛੜਾ ਬੰਦਾ ਸਲਮਾਨ ਖਾਨ ਵੀ ਇਸ ਸ਼ੋਅ ਬਨਾਮ ਬੀਬੀ ਸੰਨੀ ਨੂੰ ਹਰ ਨੁੱਕਰ ਤੋਂ ਵੇਖ ਰਿਹਾ ਹੈ ਤੇ ਉਹ ਕੁਮਾਰੀ ਲਿਉਨ ਨੂੰ ਆਪਣੀ ਫਿਲਮ ਵਿੱਚ ਹੀਰੋਇਨ ਲੈਣ ਦੀਆਂ ਸਕੀਮਾਂ ਬਣਾ ਰਿਹਾ ਹੈ। ਪੂਜਾ ਭੱਟ ਦਾ ਬਾਪ ਮਹੇਸ਼ ਭੱਟ ਵੀ ਇਸ ਮਸਾਲੇਦਾਰ ਬੀਬੀ ਵਿੱਚ ਕਲਾ ਦੀਆਂ ਘੁੰਡੀਆਂ ਭਾਲ ਰਿਹਾ ਹੈ। ਸੁਪਰ ਫਿਲਮੀ ਬਲਤਕਾਰੀ ਕਲਾਕਾਰ ਸ਼ਕਤੀ ਕਪੂਰ ਨੂੰ ਜਦੋਂ ਬਿਗ ਬੌਸ ਵਿੱਚੋ ਕੱਢਿਆ ਗਿਆ ਸੀ ਤਾਂ ਉਹ ਵੀ ਸੰਨੀ ਲਿਉਨ ਨੂੰ ਦੁਬਾਰਾ ਮਿਲਣ ਦੇ ਕੀਰਨੇ ਪਾੳਂਦਾ ਜਾਂਦਾ ਸੀ । ਉਸ ਨੁੰ ਸੋ਼ਅ ਵਿਚੋਂ ਕੱਢੇ ਜਾਣ ਦਾ ਘੱਟ ਦੁੱਖ ਸੀ ਪਰੰਤੂ ਸੰਨੀ ਨਾਲੋਂ ਵਿਛੜਨ ਦਾ ਜਿ਼ਆਦਾ। ਮਾਪੇ ਤੈਨੂੰ ਘੱਟ ਰੋਣਗੇ, ਬਹੁਤੇ ਰੋਣਗੇ ਦਿਲਾਂ ਦੇ ਜਾਨੀ। ਕੌਣ ਹੈ ਬੀਬੀ ਸੰਨੀ ਲਿੳਨ ? ਇਸ ਨੂੰ ਆਪਾਂ ਅੱਗੇ ਜਾਨਣ ਦੀ ਕੋਸਿ਼ਸ਼ ਕਰਾਂਗੇ। ਆਉ, ਜ਼ਰਾ ਅਗਾਂਹ ਚੱਲੀਏ।
ਇੱਕ ਨਹੀਂ, ਕਈ ਇੱਕੋ ਹੀ ਕਿਸਮ ਦੇ ਪੂਰੇ ਅਖ਼ਬਾਰ ਦੇ ਦੋ ਸਫਿ਼ਆਂ ਤੇ ਦੋ ਸੈਂਕੜੇ, ਹਦਾਇਤਨਾਮਾ ਬੀਵੀ ਅਤੇ ਹਦਾਇਤਨਾਮਾ ਖਾਵਿੰਦ ਵਰਗੇ ਮਰਦਾਨਾ ਅਤੇ ਜ਼ਨਾਨਾ ਮਰੀਜ਼ ਘਟਾਉਣ ਦੇ ਨਹੀਂ, ਸਗੋਂ ਸਧਾਰਣ ਲੋਕਾਈ ਦਾ ਅਪਰਾਧ ਦੀ ਹੱਦ ਤੱਕ ਯੌਨ ਸ਼ੋਸ਼ਣ ਕਰਕੇ ਮਰੀਜ਼ ਵਧਾਉਣ ਦੇ ਇਸ਼ਤਿਹਾਰ।
ਮਹਿਬੂਬ ਸ਼ਾਹ ਜੀ, ਬਾਬਾ ਰਵਿੰਦਰ ਸਿੰਘ ਜੀ ਬੇਦੀ,  ਗੁਰੂ ਜੀ ਸਮਰਾਟ,  ਬੇਗਮ ਜੀ ਸਮਰਾਟ, ਮੀਆਂ ਕਮਾਲ ਜੀ ਤੇ ਹੋਰ ਦਰਜਨਾਂ ਔਲੀਏ, ਸਾਧ, ਪੀਰ, ਫਕੀਰ, ਅੰਗ ਵਧਾਊ ਜਪਾਨੀ ਯੰਤਰਾਂ, ਤੇਲਾਂ, ਕਰੀਮਾਂ ਹੋਰ ਪਤਾ ਨਹੀ ਕੀ ਕੀ ਸਲਾਹਾਂ ਪੰਜਾਬ ਦੇ ਅਖੌਤੀ ਨਪੁੰਸਕ ਗੱਭਰੂਆਂ ਨੂੰ ਦੇਣ ਵਾਲਿਆਂ ਦਾ ਪੂਰਾ ਡੇਢ ਸਫਾ ਇੱਕ ਪੰਜਾਬੀ ਦੇ ਸਿਰੇ ਦੇ ਕਾਰੋਬਾਰੀ ਅਖ਼ਬਾਰ ਦਾ ਭਰਿਆ ਪਿਆ ਹੈ। ਮੈਂ ਆਪ ਮੁਕਲਾਵਾ ਲਈ ਜਾਂਦੇ ਇੱਕ ਨਰਮ ਉਮਰ ਦੇ ਲਾੜੇ ਨੂੰ ਹੱਥ ਵਿੱਚ ਗਾਨਾ ਬੱਧੀ ਤਲਵਾਰ ਫੜੀ ਦਵਾਈਆਂ ਵਾਲੀ ਦੁਕਾਨ ਤੋਂ ਕਾਰ ਰੋਕ ਵਿਆਗਰਾ ਖਰੀਦਦੇ ਵੇਖਿਆ ਹੈ। ਪਹਿਲਾਂ ਬੱਸ ਅੱਡਿਆਂ, ਰੇਲਵੇ ਸ਼ਟੇਸ਼ਨਾਂ  ਜਾਂ ਹੋਰ ਜਨਤਕ ਥਾਵਾਂ ਤੇ ਸਾਂਢੇ ਦਾ ਤੇਲ ਵੇਚਣ ਵਾਲੇ ਨੀਮ ਹਕੀਮ ਹੁੰਦੇ ਸਨ। ਜਿੰਨ੍ਹਾਂ ਨੇ ਕੁਝ ਕੋਹੜ ਕਿਰਲੇ ਤੇਲ ਵਿੱਚ ਕਰੇਲਿਆਂ ਵਾਂਗ ਤਲ ਕੇ ਰੱਖੇ ਹੁੰਦੇ ਸਨ ਤੇ ਨਾਜ਼ੁਕ ਔਰਤਾਂ ਦੇ ਪੋਟਿਆਂ ਜਿੱਡੀਆਂ ਨਿੱਕੀਆਂ ਨਿੱਕੀਆਂ ਸ਼ੀਸ਼ੀਆਂ ਇਸ ਗੰਦੇ ਤੇਲ ਨਾਲ ਭਰੀਆਂ ਹੁੰਦੀਆਂ ਸਨ। ਗਾਹਕ ਤੇ ਦਹਿਸ਼ਤ ਪਾਉਣ ਲਈ ਕੁਝ ਸਾਂਢੇ ਬਨਾਮ ਕੋਹੜ ਕਿਰਲਿਆਂ ਦੇ ਲੱਕ ਤੋੜ ਕੇ ਉਨ੍ਹਾਂ ਆਪਣੀ ਚਲੰਤ ਦੁਕਾਨ ਮੂਹਰੇ ਰੱਖੇ ਹੁੰਦੇ ਸਨ। ਜਿੰਨ੍ਹਾਂ ਦੀਆਂ ਸਿਰੀਆਂ ਹੁਸਿ਼ਆਰੀ ਵਿੱਚ ਆਏ ਬੰਦੇ ਦੇ ਲਿੰਗ ਵਰਗੀਆਂ ਲੱਗਦੀਆਂ ਸਨ। ਦਿਲ ਦੇ ਕਮਜ਼ੋਰ, ਅੱਧਪੜ੍ਹ, ਮਾਸੂਮ ਅਤੇ ਪੇਂਡੂ ਬੰਦੇ ਇਨ੍ਹਾਂ ਦੇ ਸਿ਼ਕਾਰ ਹੁੰਦੇ ਸਨ, ਜੋ ਝੁੱਘਾ ਫੂਕ ਕੇ ਸਾਂਢੇ ਦੇ ਤੇਲ ਦੀਆਂ ਸ਼ੀਸ਼ੀਆਂ ਖ਼ਰੀਦ ਕੇ ਚਰ੍ਹੀਆਂ ਕਮਾਦਾਂ ਵਿੱਚ ਅਭਿਆਸ ਕਰਨ ਲਈ ਚੁੱਕੀ ਫਿਰਦੇ ਸਨ। ਹੁਣ ਇਹ ਸਾਂਢੇ ਦਾ ਤੇਲ ਵੇਚਣ ਵਾਲੇ ਨੀਮ ਹਕੀਮ ਰੇਲਵੇ ਫਾਟਕਾਂ ਜਾਂ ਬੱਸ ਅੱਡਿਆਂ ਤੋਂ ਉੱਠ ਕੇ ਅਖ਼ਬਾਰਾਂ ਵਿੱਚ ਇਸ਼ਤਿਹਾਰ ਦੇਣ ਲੱਗ ਪਏ ਹਨ। ਸਾਰੇ ਇਸ਼ਤਿਹਾਰ ਵੱਖ ਵੱਖ ਗੁਪਤ ਅਗਿਆਨੀਆਂ ਦੇ ਹਨ, ਪਰੰਤੂ ਇਨ੍ਹਾਂ ਦੀ ਭਾਸ਼ਾ ਤੇ ਗਾਹਕ ਫਸਾਉਣ ਦਾ ਫੰਦਾ ਇੱਕੋ ਹੀ ਹੈ ਤੇ ਹੁਣ ਪੜ੍ਹੋ ਇਹ ਭਾਸ਼ਾ ।
ਜੋਤਿਸ਼ ਤਾਂਤਰਿਕ ਵਾਰ ਵਾਰ ਗੁਰੂ ਮੋਹਬ ਮਲਿਕ ਇੱਕ ਵਾਰ। 26 ਸਾਲਾਂ ਤੋਂ ਸਥਾਈ ਬੈਠੇ ਤਾਂਤਰਿਕਾਂ ਨੂੰ ਚੈਲਿੰਜ । ਸਾਡੇ ਤੋਂ ਪਹਿਲਾਂ ਕੰਮ ਕਰਨ ਵਾਲਿਆ ਨੂੰ 21 ਲੱਖ ਦਾ ਇਨਾਮ। 10 ਮਿੰਟਾਂ ਵਿੱਚ 101% ਗਰੰਟੀ । ਅਸ਼ਟਾਮ ਤੇ ਲਿਖਾ ਲਵੋ। ਸਪੈਸ਼ਲਿਸਟ ਵਸ਼ੀਕਰਨ, ਮੁੱਠ ਕਰਨੀ, ਕਾਰੋਬਾਰ, ਕੀਤਾ ਕਰਾਇਆ, ਗ੍ਰਹਿ ਕਲੇਸ਼, ਸੌਂਕਣ ਜਾਂ ਦੁਸ਼ਮਣ ਨੂੰ ਤੜਫਦਾ ਵੇਖੋ, ਵਿਦੇਸ਼ ਯਾਤਰਾ, ਪਿਆਰ ਵਿੱਚ ਸੱਟ ਬਨਾਮ ਫੱਟ ਖਾਧੇ ਪ੍ਰੇਮੀ ਪ੍ਰੇਮਿਕਾ ਜ਼ਰੂਰ ਮਿਲੋ, ਪਿਆਰ ਟੁੱਟਣ ਨਹੀਂ ਦੇਵਾਂਗਾ, ਇਹ ਮੇਰਾ ਵਾਅਦਾ ਹੈ। ਪਤਾ ਘੰਟਾ ਘਰ ਚੌਂਕ, ਮਿਨਰਵਾ ਕੰਪਲੈਕਸ ਲੁਧਿਆਣਾ, ਟੈਲੀਫੋਨ ਨੰਬਰ 9876492656      ਨੋਟ : ਮਨਭਾਉਂਦੇ ਸਿੱਟਿਆਂ ਲਈ ਪੁਰਸ਼ਾਰਥ ਤੇਲ ਦੀ ਵੀ ਵਰਤੋਂ ਕਰੋ। ਇੱਕ ਮਹੀਨੇ ਦੀ ਦਵਾਈ ਦੇ ਨਾਲ ਅੰਗ ਵਧਾਊ ਯੰਤਰ ਤੇ ਕਾਮ ਸੂਤਰ ਡੀ. ਵੀ. ਡੀ. ਮੁਫ਼ਤ। ਇਹੋ ਜਿਹੇ ਇਸ਼ਤਿਹਾਰਾਂ ਨਾਲ ਅਖ਼ਬਾਰ ਦਾ ਪੂਰਾਂ ਡੇਢ ਸਫਾ ਭਰਿਆ ਪਿਆ ਹੈ। ਨਾਲ ਹੀ ਮੈਨੇਜਰ ਦੀ ਬੇਨਤੀ ਹੈ ਕਿ 1 ਨਵੰਬਰ 2011 ਤੋਂ ਇਹੋ ਜਿਹੇ ਵਿਗਿਆਪਨਾਂ ਦੀ ਕੀਮਤ 1700 ਰੁਪੈ ਹੋਵੇਗੀ।
ਚਲੋ ਅੱਗੇ ਚਲੀਏ।
ਖ਼ਬਰ ਇੱਕ । ਨਗਨ ਤਸਵੀਰਾਂ ਦੇ ਵਿਵਾਦ ਨਾਲ ਤਾਂ ਮੇਰੀ ਉਮਰ ਹੀ ਦਸ ਸਾਲ ਵੱਡੀ ਹੋ ਗਈ ਹੈ। ਪਾਕਿਸਤਾਨੀ ਅਦਾਕਾਰਾ ਵੀਨਾ ਮਲਿਕ।
ਵੀਨਾ ਮਲਿਕ ਕਹਿੰਦੀ ਹੈ, ਐਚ. ਐਮ. ਐਫ. ਨਾਂ ਦੇ ਰਸਾਲੇ ਲਈ ਤਸਵੀਰਕਸ਼ੀ ਸਮੇਂ ਉਸ ਨੇ ਪੂਰੀ ਨਗਨ ਅਵਸਥਾ ਵਿੱਚ ਅਪਣੇ ਹੱਥਾਂ ਪੈਰਾਂ ਨਾਲ ਅਪਣੇ ਸਾਰੇ ਹੀ ਗੁਪਤ ਅਗੁਪਤ ਅੰਗ ਪੂਰੀ ਕੁਸ਼ਲਤਾ ਨਾਲ ਢਕ ਲਏ ਸਨ, ਸਿਰਫ਼ ਆਈ. ਐਮ. ਆਈ. ਦਾ ਸ਼ਰਾਰਤੀ ਬੇਸ਼ਰਮ ਟੈਟੂ ਹੀ ਨੰਗਾ ਰਹਿ ਗਿਆ ਸੀ ਤੇ ਇਸ ਵਿਵਾਦ ਨਾਲ ਮੇਰੀ ਉਮਰ ਦਸ ਸਾਲ ਵਧ ਗਈ ਹੈ। ਜੀਉ ਬੀਬੀ ਜੀ। ਕੁੰਭ ਦੇ ਮੇਲੇ ਸਮੇਂ ਹਜ਼ਾਰਾਂ ਦੀ ਗਿਣਤੀ ਵਿੱਚ ਨਾਗੇ ਸਾਧੂਆਂ ਵਲੋਂ ਸਭ ਤੋਂ ਪਹਿਲਾਂ ਗੰਗਾ ਵਿੱਚ ਪਵਿੱਤਰ ਨਗਨ ਇਸ਼ਨਾਨ ਕਰਨਾ ਵੀ ਸ਼ਾਇਦ ਏਸੇ ਪਾਕੀਜ਼ਾ ਬੀਬੀ ਦੀ ਗੱਲ ਦੀ ਤਾਇਦ ਕਰਦਾ ਹੈ। ਬੀਬੀ ਵੀਨਾ ਮਲਿਕ, ਜੀ ਆਇਆਂ ਨੂੰ ਹਿੰਦੁਸਤਾਨ ਵਿੱਚ। ਪੰਜਾਬੀ ਦੀ ਇੱਕ ਕਹਾਵਤ ਹੈ ਖ਼ਰਬੂਜ਼ੇ ਨੂੰ ਵੇਖ ਕੇ ਖ਼ਰਬੂਜ਼ਾ ਰੰਗ ਬਦਲਦਾ ਹੈ ਤੇ ਹਿੰਦੁਸਤਾਨ ਨੁੰ ਵੇਖ ਕੇ ਪਾਕਿਸਤਾਨ, ਬੰਗਲਾਦੇਸ਼। ਇੰਦਰਾ ਗਾਂਧੀ ਬਨਾਮ ਹੁਸੀਨਾ ਸ਼ੇਖ, ਬਨਾਮ ਬੇਨਜ਼ੀਰ ਭੁੱਟੋ। ਬੀਬੀ ਜੀ ਜ਼ਰਾ ਬਚ ਕੇ ਰਹੋ ਬੰਬ ਧਮਾਕੀ ਤਾਲੀਬਾਨੀਆਂ ਤੇ ਲਾਲ ਮਸੀਤ ਵਾਲੇ ਮੁਲਾਣਿਆਂ ਤੋਂ, ਤੁਸੀਂ ਕੱਲਰ ਦੇ ਸੱਪ ਦੀ ਪੂਛ ਤੇ ਪੈਰ ਧਰ ਲਿਆ ਹੈ। ਮੈਂ ਤੁਹਾਡਾ ਪ੍ਰਸੰਸਕ ਹਾ। ਵੱਡਾ ਜ਼ੇਰਾ ਹੈ ਤੁਹਾਡਾ। ਖੁਬਸੂਰਤ ਦੇਹ ਦੇ ਦਰਸ਼ਨ ਕਰਾਉਣ ਲਈ ਧੰਨਵਾਦ।
ਖ਼ਬਰ ਦੋ । ਨਗਨ ਤਸਵੀਰਾਂ ਵਾਲੇ ਮਸ਼ਹੂਰ ਤੇ ਸਿਰਫ਼ ਬਾਲਗਾਂ ਲਈ ਰਸਾਲੇ ਪਲੇਅ-ਬੁਆਏ ਦੀ ਰਿਕਾਰਡ ਤੋੜ ਵਿਕਰੀ । ਨਗਨ ਤਸਵੀਰਾਂ ਖਿਚਵਾਉਣ ਨਾਲ ਮਿਲਿਆ ਹੈ ਆਤਮ ਵਿਸ਼ਵਾਸ। ਲਿੰਡਸੇ ਲੋਹਾਨ ਬਨਾਮ ਵੀਨਾ ਮਲਿਕ।
ਮਸ਼ਹੂਰ ਹਾਲੀਵੁੱਡ ਅਦਾਕਾਰਾ ਲਿੰਡਸੇ ਲੋਹਾਨ, ਪਾਕਿਸਤਾਨੀ ਕਮ ਹਿੰਦੁਸਤਾਨੀ ਅਦਾਕਾਰਾ ਵੀਨਾ ਮਲਿਕ, ਗੰਦੀ ਤਸਵੀਰ (ਡਰਟੀ ਪਿਕਚਰ) ਵਾ਼ਲੀ ਵਿਦਿਆ ਬਾਲਨ, ਜ਼ੀਰੋ ਸਾਇਜ਼ ਤੋਂ ਮੁਮਤਾਜ, ਵੈਜਿੰਤੀ ਮਾਲਾ, ਆਸ਼ਾ ਪਾਰਿਖ ਜਾਂ ਮੋਟੇ ਪੱਟਾਂ ਵਾਲੀ ਸਾਇਰਾਬਾਨੋ ਦੀ ਨਕਲ ਤੇ ਚਲਣ ਵਾਲੀ ਕਰੀਨਾ ਕਪੂਰ । ਇਹ ਸਾਰੇ ਖਪਤਵਾਦੀ, ਭੋਗਵਾਦੀ ਸੱਭਿਆਚਾਰ ਦੇ ਹਾਈਬਰਿਡ ਰੋਲ ਮਾਡਲ ਹਨ। ਇਹ ਉਹ ਸਿ਼ੰਗਾਰੀਆਂ ਗਾਵਾਂ ਹਨ, ਜਿੰਨ੍ਹਾਂ ਨੂੰ ਬੁੱਚੜਖਾਨੇ ਵਿੱਚ ਦੂਸਰੇ ਜਾਨਵਰਾਂ ਨੂੰ ਰੀਸ ਕਰਾਉਣ ਲਈ ਪਹਿਲਾਂ ਕਤਲਗਾਹ ਦੇ ਰਾਹ ਤੋਰਿਆ ਜਾਂਦਾ ਹੈ । ਇਸ ਸਿ਼ੰਗਾਰੀ ਗਾਂ ਨੂੰ ਤਾਂ ਸਾਫ਼ ਕੱਢ ਲਿਆ ਜਾਂਦਾ ਹੈ ਤੇ ਦੂਸਰੇ ਡੰਗਰਾਂ ਦਾ ਵਢਾਂਗਾ ਸ਼ੁਰੂ ਹੋ ਜਾਂਦਾ ਹੈ।
ਇਕ ਹੋਰ ਇਸ਼ਤਿਹਾਰ।
ਮਰਦਾਂ ਦੀ ਪਹਿਚਾਨ (ਵੱਡੇ ਅੱਖਰਾਂ ਵਿੱਚ) ਚੀਤੇ ਵਰਗੀ ਜਾਨ।
ਸੈਕਸ ਕੁਦਰਤ ਦਾ ਅਨਮੋਲ ਤੋਹਫ਼ਾ ਹੈ। ਇੱਕ ਔਰਤ ਮਰਦ ਤੋਂ ਬਹੁਤ ਕੁਝ ਚਾਹੁੰਦੀ ਹੈ ਪਰ ਮਰਦ ਔਰਤ ਤੋਂ ਇੱਕੋ ਹੀ ਸੁੱਖ ਭਾਲਦਾ ਹੈ ਉਹ ਹੈ ਸੈਕਸ। ਸੈਕਸ, ਸੰਤਾਨ ਪ੍ਰਾਪਤੀ ਹੀ ਨਹੀਂ ਸਗੋਂ ਸਰੀਰਕ ਮਾਨਸਿਕ ਸੰਤੁਸ਼ਟੀ ਦਾ ਵੀ ਕਾਰਗਰ ਸਾਧਨ ਹੈ, ਜੇ ਕੋਈ ਇਸ ਸੁੱਖ ਤੋਂ ਵਾਂਝਾ ਹੋਵੇ ਤਾਂ ਉਸ ਦਾ ਮਨ ਕਿਸੇ ਵੀ ਕੰਮ ਵਿੱਚ ਨਹੀਂ ਲੱਗਦਾ। ਸਹੀ ਇਲਾਜ ਅਤੇ ਸਹੀ ਜਾਣਕਾਰੀ ਲਈ ਆਪਣੇ ਨਜ਼ਦੀਕੀ ਸ਼ਹਿਰ ਵਿੱਚ ਮਿਲੋ।
ਤਰਨ ਆਯੁਰਵੈਦਿਕ ਸੈਂਟਰ ਰਜਿ:
ਹੋਟਲ ਇੰਟਰਨੈਸ਼ਨਲ ਕੰਪਲੈਕਸ, ਨੇੜੇ ਬੱਸ ਅੱਡਾ, ਜਲੰਧਰ
 (‘ਤੇ ਹੁਣ ਛੋਟੇ ਅੱਖਰਾਂ ਵਿੱਚ)
ਲਿੰਗ ਦਾ ਹੈਰਾਨੀ ਜਨਕ ਵਾਧਾ । 1 ਕਰੀਮ ਨਾਲ਼ 10 ਦਿਨਾਂ ਤੱਕ ਮਸਾਜ ਰਾਹੀਂ ਨਵਾਂ ਇਲਾਜ । ਸਮਾਂ ਵਧਾਉ, ਨਾਮਰਦੀ ਦੂਰ ਕਰੋ। ਕਮਜ਼ੋਰ ਹੀ ਨਹੀਂ ਸ਼ੌਕੀਨ ਵੀ ਵਰਤੋਂ ਕਰੋ। ਸ਼ੀਘਰ ਪਤਨ, ਨਸਾਂ ਦਾ ਢਿੱਲਾਪਣ, ਅੰਗ ਵਧਾਊ, 75 ਸਾਲਾਂ ਤੱਕ ਜ਼ਬਰਦਸਤ ਜੋਸ਼, ਪੱਥਰ ਨਾਲ ਮਾਰੋਗੇ ਤਾਂ ਟੰਨ ਕਰਦੀ ਆਵਾਜ਼ ਆਏਗੀ ਤੇ ਅੱਗੇ ਮੈਨੂੰ ਸ਼ਰਮ ਆਉਂਦੀ ਹੈ ਲਿਖਦਿਆਂ, ਕ੍ਰਿਪਾ ਕਰਕੇ ਆਪ ਪੜ੍ਹ ਲਿਉ ਅਖ਼ਬਾਰਾਂ ਵਿੱਚ।
ਆਓ ਕੜੀ ਜੋੜੀਏ। ਬਿੱਗ ਬ੍ਰਦਰ ਵਾਜ਼ ਵਾਚਿੰਗ। ਇਹ ਕੋਈ ਕਿਤਾਬ ਸੀ, ਜਿਸ ਤੋਂ ਹੌਲੈਂਡ ਦੇ ਟੀ. ਵੀ. ਵਿਰੋਨਿਕਾ ਨੇ ਇਹ ਬਿਗ ਬ੍ਰਦਰ ਨਾਮੀ ਲਾਇਫ ਪ੍ਰੋਗਰਾਮ ਬਣਾਇਆ ਸੀ। ਇਸ ਸ਼ੋਅ ਵਿੱਚ ਵੱਖ ਵੱਖ ਕਿੱਤਿਆਂ ਅਤੇ ਧਰਮਾਂ ਵਾਲਿਆਂ ਆਮ ਅਤੇ ਮਸ਼ਹੂਰ ਲੋਕਾਂ ਨੂੰ ਇੱਕ ਵੱਡੇ ਘਰ ਵਿੱਚ ਤਿੰਨ ਮਹੀਨਿਆਂ ਤੱਕ ਰੱਖਿਆ ਜਾਂਦਾ ਹੈ, ਜਿੰਨ੍ਹਾਂ ਦਾ ਬਾਹਰੀ ਦੁਨੀਆਂ ਨਾਲ ਕੋਈ ਸੰਬੰਧ ਨਹੀਂ ਹੁੰਦਾ। ਇਹ ਟੀ. ਵੀ. ਪ੍ਰੋਗਰਾਮ ਯੂਰਪ, ਅਮਰੀਕਾ ਤੋਂ ਛੁੱਟ ਪੂਰੇ 74 ਦੇਸ਼ਾਂ ਵਿੱਚ ਵੱਖ ਵੱਖ ਨਾਵਾਂ ਥੱਲੇ ਬਹੁਤ ਹੀ ਮਕਬੂਲ ਹੋਇਆ। ਹਿੰਦੁਸਤਾਨ ਦੇ ਨਕਲਚੀਆਂ ਨੂੰ ਯੂਰਪ ਅਮਰੀਕਾ ਦੀ ਹਰ ਹੰਢਾਈ, ਚਗਲੀ ਚੀਜ਼ ਹੀ ਰਾਸ ਆ ਜਾਂਦੀ ਹੈ । ਜਿਸ ਤਰ੍ਹਾਂ ਇਹ ਹਾਲੀਵੁੱਡ ਦੀਆਂ ਫਿਲਮਾਂ ਨੂੰ ਤੋੜ ਮਰੋੜ ਕੇ ਹਿੰਦੀ ਫਿਲਮਾਂ ਬਣਾਈ ਜਾਂਦੇ ਹਨ। ਸਾਰੀ ਦੁਨੀਆਂ ਦਾ ਵੱਡਾ ਬਾਈ ਬਨਾਮ ਅਮਰੀਕਾ ਬੜੇ ਚਿਰਾਂ ਤੋਂ ਵੇਖ ਰਿਹਾ ਸੀ ਕਿ ਕਿਸ ਤਰ੍ਹਾਂ ਹਾਲੀਵੁੱਡ ਦੀ ਹੀ ਫੇਲ੍ਹ ਹੋਈ ਪੋਰਨੋ ਸਨਅਤ ਨੂੰ ਹਿੰਦੁਸਤਾਨ ਦੇ ਲੋਕਾਂ ਵਿੱਚ ਮਕਬੂਲ ਅਤੇ ਆਮ ਵਰਤਾਰਾ ਬਣਾਇਆ ਜਾਵੇ। ਭਾਰਤ ਦੇਸ਼ ਦੀ ਦੋਗਲੇ ਕਿਰਦਾਰ ਦੀ ਮਾਲਕ ਮਿਡਲ ਕਲਾਸ, ਜੋ ਚੋਰੀ ਛਿਪੇ ਇੰਟਰਨੈੱਟ ਤੇ ਸਭ ਕੁਝ ਵੇਖਦੀ ਹੈ, ਨੂੰ ਨੰਗਾ ਕੀਤਾ ਜਾਵੇ ਤੇ ਉਨ੍ਹਾਂ ਨੂੰ ਗੁਨਾਹ ਵਰਗੇ ਅਹਿਸਾਸ ਤੋਂ ਮੁਕਤ ਵੀ ਕਰਾਇਆ ਜਾਵੇ। ਆਪਣੇ ਇਸ ਮਾੜੇ ਧੰਦੇ ਦਾ ਝੰਡਾ ਹਿੰਦੁਸਤਾਨ ਵਿੱਚ ਗੱਡਿਆ ਜਾਵੇ। ਬਿੱਗ ਬੌਸ ਵਿੱਚ ਜੇ ਕੋਈ ਗੋਰੀ ਪੋਰਨੋ ਸਟਾਰ ਹੁੰਦੀ ਤਾਂ ਕੋਈ ਖਾਸ ਅਸਰ ਨਹੀਂ ਸੀ ਪੈਣਾ । ਇਸ ਕਰਕੇ ਕੈਨੇਡੀਅਨ ਸਿੱਖ ਮੂਲ ਦੀ ਇਸ ਬੀਬੀ ਸੰਨੀ ਲਿਉਨ ਨੂੰ ਜਾਣ ਬੁੱਝ ਕੇ ਇਸ ਸੋ਼ਅ ਵਿੱਚ ਲਿਆਂਦਾ ਗਿਆ । ਪਹਿਲਾਂ ਉਸ ਦੀ ਪਹਿਚਾਣ ਛੁਪਾਈ ਗਈ ਸੀ (13 ਮਈ 1981 ਨੂੰ ਜੰਮੀ ਇਸ ਕੁੜੀ ਸੰਨੀ ਲਿਉਨ ਦਾ ਅਸਲ ਨਾਂ ਕਰਨ ਮਲਹੋਤਰਾ ਹੈ) ਮੌਕਾ ਵੇਖ ਕੇ ਹੌਲੀ ਹੌਲੀ ਉਸ ਦੇ ਕਿੱਤੇ ਨੁੰ ਸਹਿੰਦਾ ਸਹਿੰਦਾ ਅਖਬਾਰਾਂ ਵਿੱਚ ਨਸ਼ਰ ਕੀਤਾ ਗਿਆ। ਵੈੱਬਸਾਈਟੀ ਸ਼ੌਕੀਨ ਬੁੱਢੇ ਜਵਾਨ ਤਾਂ ਇਸ ਗਰਮ ਸਮੋਸੇ ਨੂੰ ਪਹਿਲਾਂ ਹੀ ਜਾਣਦੇ ਸਨ। ਕੁਝ ਸਮਾਜਸੇਵੀ (ਹੋ ਸਕਦਾ ਹੈ ਇਹ ਜੱਥੇਬੰਦੀਆਂ ਨਕਲੀ ਜਾਂ ਅਖਬਾਰੀ ਹੀ ਹੋਣ) ਜੱਥੇਬੰਦੀਆਂ ਤੋਂ ਲੋਕਾਂ ਦਾ ਧਿਆਨ ਖਿੱਚਣ ਲਈ  ਇਸ ਪ੍ਰੋਗਰਾਮ ਨੂੰ ਅੱਧੀ ਰਾਤ ਤੋਂ ਬਾਅਦ ਕਰਵਾਉਣ ਲਈ ਵਾਵੇਲਾ ਕਰਵਾਇਆ ਗਿਆ । ਬਿੱਲੀ ਵਰਗੀ ਪ੍ਰੈੱਸ ਦੇ ਭਾਅ ਦਾ ਇਹ ਸੰਨੀ ਲਿਉਨ ਬਨਾਮ ਕਰਨ ਮਲਹੋਤਰਾ ਵਾਲਾ ਛਿੱਕਾ ਮਸਾਂ ਹੀ ਟੁੱਟਾ ਸੀ। ਸਾਰੀਆਂ ਅੰਗਰੇਜ਼ੀ ਦੀਆਂ ਅਖਬਾਰਾਂ ਇਥੋ ਤੱਕ ਪੰਜਾਬੀ ਦੀ ਇੱਕ ਅਖਬਾਰ ਦੀ ਵੀ ਇਹ ਪਹਿਲੇ ਸਫ਼ੇ ਦੀ ਖ਼ਬਰ ਸੀ। ਅਖ਼ਬਾਰਾਂ ਵਿੱਚ ਚਰਚਾ ਨੇ ਅੱਧੀ ਰਾਤ ਵਾਲੀ ਗੱਲ ਵਿੱਚ ਸੇਕ ਭਰਿਆ ਤੇ ਹੌਲੀ ਹੌਲੀ ਬੀਬੀ ਸੰਨੀ ਲਿਉਨ ਨੇ ਅਪਣੀ ਪੋਰਨੋ ਫਿਲਮਾਂ (ਲੁੱਚੀਆਂ ਫਿਲਮਾਂ) ਵਿੱਚ ਕੰਮ ਕਰਨ ਵਾਲੇ ਕਸਬ ਨੂੰ ਸ਼ਰੇਆਮ ਨਸ਼ਰ ਕਰ ਦਿੱਤਾ। ਸੰਨੀ ਦੇ ਮਾਪਿਆਂ ਨੇ ਆਪਣੀ ਸ਼ੇਰਨੀ ਧੀ ਦੇ ਹੱਕ ਵਿੱਚ ਬਿਆਨ ਦੇ ਦਿੱਤੇ ਤੇ ਉਸੇ ਰਾਤ ਬੀਬੀ ਸੰਨੀ ਲਿਉਨ ਦੀ ਵੈਬਸਾਇਟ ਨੂੰ ਕਲਿੱਕ ਬਨਾਮ ਵੇਖਣ ਵਾਲਿਆਂ ਦੀ ਗਿਣਤੀ ਕਰੋੜਾਂ ਹਿੰਦੁਸਤਾਨੀਆਂ ਦੀ ਹੋ ਗਈ ਤੇ ਕੱਲ ਤੱਕ ਦੀ ਗੁਮਨਾਮ ਪੋਰਨੋ ਕਾਮੀ ਸੰਨੀ ਬਨਾਮ ਕਿਰਨ ਮਲਹੋਤਰਾ ਰਾਤੋ ਰਾਤ ਅਮੀਰ ਅਤੇ ਸੁਪਰ ਸਟਾਰ ਬਣ ਗਈ। ਗੂਗਲ ਸਰਚ ਨੇ ਸ਼ਰੀਫ਼ ਹਿੰਦੁਸਤਾਨੀਆਂ ਦਾ ਅਸਲੀ ਕਿਰਦਾਰ ਵੀ ਅੰਕੜਿਆਂ ਦੇ ਰੂਪ ਵਿੱਚ ਨਸ਼ਰ ਕਰ ਦਿੱਤਾ। ਹੁਣ ਸੰਨੀ ਐਸ਼ਵਰਿਆ, ਕੈਥਰੀਨਾ ਕੈਫ, ਕਰੀਨਾ ਕਪੂਰ ਨੂੰ ਵੀ ਪਿੱਛੇ ਛੱਡ ਗਈ ਹੈ। ਬਦਨਾਮ ਮੁੰਨੀ, ਸ਼ੀਲਾ ਕੀ ਜਵਾਨੀ ਜਾਂ ਚਿਕਨੀ ਚਮੇਲੀ ਹੁਣ ਬੋਰ ਆਈਟਮਾਂ ਹਨ। ਹੁਣ ਤਾਂ ਨੰਬਰ ਵਨ ਸੋਨੇ ਰੰਗੀ ਸੰਨੀ ਬੀਬੀ ਦੀ ਦੇਹ ਦੀ ਚਿਲਕੋਰ ਨੇ ਸਾਰੇ ਦਰਸ਼ਕ ਹੀ ਅੰਨ੍ਹੇ ਕਰ ਕੇ ਰੱਖ ਦਿੱਤੇ ਹਨ, ਸਣੇ ਸਲਮਾਨ ਖਾਨ। ਸੰਨੀ ਹੁਣ ਹਿੰਦੁਸਤਾਨ ਦੀ ਪਰਿਟੀ ਵੁਮੈਨ ਹੈ। ਸੰਨੀ ਨੇ ਤਾਂ ਉਥੋ ਸ਼ਰੂਆਤ ਕੀਤੀ ਹੈ ਜਿੱਥੋਂ ਤੱਕ ਕਰੀਨਾ, ਕੈਥਰੀਨਾ, ਬਿਪਾਸ਼ਾ ਜਾਂ ਹੋਰ ਕੋਈ ਬਾਲੀਵੁੱਡ ਦੀ ਅਭਿਨੇਤਰੀ ਸੁਫ਼ਨੇ ਵਿੱਚ ਵੀ ਨਹੀਂ ਸੋਚ ਸਕਦੀ, ਜੇ ਸੋਚੇਗੀ ਸ਼ਾਇਦ ਕਰ ਨਹੀਂ ਸਕੇਗੀ। ਭਾਰਤੀ ਦੂਰਦਰਸ਼ਨੀ ਸੱਭਿਆਚਾਰ ਵਿੱਚ ਵੱਡੇ ਭਰਾ ਬਨਾਮ ਅਮਰੀਕਾ ਤੇ ਉਸ ਦੇ ਪਿਛਲੱਗ ਟੈਲੀਵੀਯਨ ਨੇ ਕਿਰਨ ਮਲਹੋਤਰਾ ਬਨਾਮ ਸੰਨੀ ਲਿਉਨ ਨਾਂ ਦਾ ਐਸਾ ਐਟਮ ਬੰਬ ਸਿੱਟਿਆ ਹੈ, ਜਿਸ ਦੇ ਸਿੱਟੇ ਭਵਿੱਖ ਵਿੱਚ ਅਮਰੀਕਾ ਯਾਨਿ ਕਿ ਵੱਡੇ ਭਰਾ ਦੇ ਅਨੁਕੂਲ ਹੀ ਨਿੱਕਲਣਗੇ, ਠੀਕ ੳਸੇ ਤਰ੍ਹਾਂ ਜਿਵੇਂ ਦੂਜੀ ਵੱਡੀ ਸੰਸਾਰ ਜੰਗ ਤੋਂ ਬਾਅਦ ਪੱਛਮੀ ਯੂਰਪ ਤੇ ਨੱਬਵਿਆਂ ਵਿੱਚ ਪੁਰਬੀ ਯੂਰਪ ਬਨਾਮ ਸੋਵੀਅਤ ਯੂਨੀਅਨ ਦਾ ਢਹਿ ਢੇਰੀ ਹੋਣਾ ਅਤੇ ਹੁਣ ਨਿਸ਼ਾਨੇ ਤੇ ਹਿੰਦੁਸਤਾਨ ਹੈ। ਵੇਖਦੇ ਹਾਂ ਰਿਸ਼ੀਆਂ ਮੁਨੀਆਂ ਦਾ ਇਹ ਦੇਸ਼ ਇਹ ਝਾਲ ਕਿੱਥੋ ਕੁ ਤੱਕ ਝੱਲ ਸਕਦਾ ਹੈ?                       
****

No comments: